Алтыншы симфония (Құрманғазы)

"Алтыншы симфония" ("Құрманғазы") - Е.Г. Брусиловскийдің симфониясы. Алғаш 1965 жылы Қазақ симфониялық оркестрі (дирижері И.З. Островский) орындады. Шығарма Құрманғазы күйлерінің негізінде жазылған. Төрт бөлімнен тұратын симфонияда Құрманғазының "Түрмеден қашқан", "Ақбай" және "Сарыарқа" күйлері пайдаланылды. Брусиловский ұлы күйшінің күрескерлік рухын симфониялық драматургияны өрістете дамыту, ширықтыру арқылы бейнелейді. Мұнда симфониядағы еуропалық формалар мен заңдылықтар қазақтың аспаптық музыкасындағы дәстүрлермен тығыз араласып жатыр. Мысалы, симфонияның 2-бөлімі "Ақбай" күйіне негізделгенімен пассакалья түрінде жазылған.