Валюта Курсы

Валюта курсы, валюта бағамы — бір елдің ақша бірлігінің екінші бір елдің ақша бірлігімен белгіленген құны. Валюта курсы, көбінесе, ұлттық валюталардың халықаралық ақша бірлігіне, мыс., ЭКЮ-ге, СДР-ге (қарыз берудің арнайы құқығы) қатынасы бойынша қолданылады. Қазіргі кезде валюта курсы валюталардың сатып алуға жарамдылығын ескере отырып белгіленеді және өте айнымалы болып табылады (кестені қ.). Валюта курсына ықпал ететін негізгі факторлар қатарына елдің төлем балансының жай-күйі, инфляция деңгейі, қысқа мерзімді капиталдардың елдер арасындағы ауыс-түйісі, сондай-ақ, саяси дағдарыс пен әскери қақтығыстар (соғыс) жатады. Ұлыбританиядан басқа елдердің бәрінде тікелей баға белгіленімі қолданылады, мұнда шет ел валютасының 1 (100, 1000) өлшемінің ұлттық валютаға шаққандағы құны бойынша белгіленеді. Ұлыбританияда кері баға белгіленімі — 1 фунт стерлингтің шет ел валютасына шаққандағы құны қабылданған. Мысалы, ағылшын фунт стерлингінің валюта курсы 1,2 АҚШ долларына тең болса, валюта нарығында фунт стерлинг пен доллар осы қатынаста айырбасталады. Валюта нарығында сатып алу-сату мәмілелерін жасау барысында спот-курс (мәміле жасау кезінде тағайындалған бір елдің ақша бірлігінің екінші бір елдің ақша бірлігіне қатысты бағасы), форвард-курс (белгілі бір валютаның жасалынған шарт талаптарына сай белгіленген мерзімде сатылатын не сатып алынатын бағасы) секілді курс түрлері қолданылады.

Валюта Курсы