Дила Саймағанбетов

Саймағанбетов Дила (1914, Маңғыстау ауданы, Иірдің ойы – 1995) – педагог, соғыс ардагері. Астрахан қаласына оқуға жіберіліп, оқуды бітірісімен, Шағала елді мекеніндегі ересектердің сауатын ашу жұмысымен шұғылданған. 1954 жылға дейін Шетпе, Оңды, Жармыш, Үштаған, Ақтөбе мектептерінде мұғалім, оқу ісінің меңгерушісі, директор қызметтерін атқарды. 1956 ж. Үштаған ауылында көлемі 10 га бау-бақша паркін жасақтауды ұйымдастырды. Саймағанбетов өз қолымен 14 түрлі жеміс ағаштарын өсірген. Қазір бұл бақ «Дила бағы» деп аталады. Қазақстан «Халық ағарту ісінің озаты» деген құрметті атақтың иегері. «Ерлігі үшін», «Еңбектегі ерлігі үшін» медальдарымен, КСРО және Қазақ КСР-і Оқу мин-нің Құрмет грамоталарымен марапатталған.