Марионетка (фр. marionetta — Мария қызды бейнелейтін кішкентай қуыршақ) — театр қуыршағының бір түрі. Ортағасырлық кейіпкер Мария қыздың атымен аталған. Марионетканы шымылдық қалқасынан актер жіптер немесе таяқшалар арқылы қимылдатып отырады. Оны терракотадан, ағаштан, піл сүйегінен, күмістен, былғарыдан, т.б. жасайды. Ең көп таралған марионетка қуыршағының басы мен денесі ағаштан ойылған. Қуыршақтың басына бекітілген темір сым арқылы актер оны қимылға келтіреді. Марионетканың күрделірек түрі — темір сыммен және қуыршақтың қимылдайтын буындарына байланған жіптердің екінші ұшын “вага” деп аталатын ағашқа байлап, осы вага арқылы актердің қуыршақты басқаруына лайықталған. Қазіргі кәсіби қуыршақ театрларында көбінесе тек жіппен басқарылатын марионетка пайдаланылады. Ауыспалы мағынада бөтен біреудің қолшоқпарына айналған мемлекетті, саяси топты немесе үкімет адамын марионетка деп атайды.[1]

Марионетка

Дереккөздер өңдеу

  1. Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8