Семсершөп (Cladium) — қияқөлеңдер тұқымдасына жататын көп жылдық шөптесін өсімдік. Қазақстанда Қаратау жотасындағы тау өзендері мен су қоймаларының жағалауларында кездесетін 1 түрі — кәдімгі семсершөп (С. marіscus) бар. Оның биіктігі 1,5 метрдей. Тамыры жуан, таспа жапырақтары ұзын, ұшына қарай үшбұрыштанып, жиегі ара тісті үшкір, семсер тәрізді болады, өсімдіктің аты осыған байланысты қойылған. Гүлі қос жынысты, тығыздалған масақтардан жиналып, шоқ-шоқ болып, сыпыртқы гүлшоғырын құрайды. Тұқымынан көбейеді, маусым — шілде айларында гүлдеп, жеміс береді. Жемісі — қою қоңыр түсті жаңғақша, олар су арқылы таралады. Кәдімгі С. — өте сирек кездесетін өсімдік, Қазақстанның “Қызыл кітабына” енгізілген. [1]
- ↑ Красная книга Казахстана, ч. 2, А.-А., 1981.
