Титрлік талдау

Титрлік талдау, титриметрлік талдау, титриметрлік әдіс (франц. tіtre – сапа, сипат) – сандық талдау әдістерінің жиынтығы. Титрлік талдауда зерттелетін құраушының мөлшері онымен әрекеттесуге жұмсалатын реактив (титрант) көлеміне сәйкестендіріліп есептелінеді. Титрлік талдауда химиялық реакцияны жүзеге асыру – талдаудың соңғы сатысы болып табылады. Титрлік талдау кезінде реактивті сыналатын ерітіндіге біртіндеп қосады. Реактив ретінде концентрациясы нақты арнайы ерітінділер және стандартты титрленген ерітінділер (СТЕ) пайдаланылады. Титрлік талдау орындау әдісі бойынша тура, кері, жанама, ал химиялық реакциялардың түрлеріне қарай қышқыл-негіздік, тотығу-тотықсыздану, кешенді, т.б. титрлеу әдістері болып бөлінеді. Титрлік талдаудың соңғы нәтижесін білу үшін индикаторлық және аспаптық әдістер қолданылады. Бұл әдістердің барлығында да нәтижелерді есептеу титрлеуді эквивалентті нүктеге дейін жүргізуге негізделген.