Әулиеата партия ұйымы

Әулиеата партия ұйымы – 1917 жылы желтоқсанның аяқ кезінде құрылған большевиктік ұйым. 1919 жылдың 9 сәуіріне дейін «Большевик-коммунистердің фракциясы» деп аталды. Ұйым басшылары С.Хмелевский, Н.Чернышев, Ф.Федоров-Завадский, С.Карев, Д.Цыганковтар меньшевиктер мен эсерлерге қарсы үзілді-кесілді күрес жүргізді, қалада және уезде Кеңес өкіметін орнату және нығайту жұмыстарымен шұғылданды, ірі капиталистік элементтердің жерін, мал-мүліктерін еріксіз алып, оларды кедей еңбекшілерге бөліп берді, алғашқы советтік шаруашылық – совхоз, коммуналар ұйымдастырды. Байлар мен кулактардың контрреволюциялық бүліктерін басу ісіне басшылық етті. Ұйымның белсенді мүшесі С.Карев эсерлер ұйымдастырған Беловодск контрреволюциялық бүлігіне қарсы қарулы күресте ерлікпен қаза тапты. 1919 жылы қазанда РК(б)П Әулиеата уездік ұйымы болып қайта құрылды.