Белгілі бір тұлға жайлы мақала ашқанда, мақала атауына толық аты-жөнін жазу шарт па? Мәселен, Пеле туралы мақалаға оның толық аты-жөнін жазбай-ақ, "Пеле" деп тақырып қоя салған. Ол енді танымал ғой. Луиш Фигуді де солай еттік. Жалпы, шетелдік тұлғалардың бәрін солай жасап жатырмыз. Ал енді өз қазағымыздың немесе Ресейдің тұлғаларын да толық аты-жөндерін қоймай-ақ мақала аша берсек қайтеді деген ой келіп жатыр.
Мысалы, "Нұрбол Жұмасқалиев" деп әкесінің атын қоспай-ақ тақырып аштық делік. Оның футболшы екенін футболдан шамалы ғана хабары бар кез келген қазақстандық біледі. "Нұрбол Жәрдемұлы..." деп жатпасақ та жақсы таниды бәрі. Егерде Нұрбол Жұмасқалиев атты тағы бір танымал тұлға пайда боп жатса, онда, ок, әкесінің атын қосып, атауын өңдей саламыз, немесе "Нұрбол Жұмасқалиев (футболшы)", "Нұрбол Жұмасқалиев (әнші)" деген секілді етіп. Сол секілді "Игорь Беланов", "Александр Кержаков" дегендей аты-жөнін шұбатпай-ақ тақырып қоя берсек те, мақаланың кім жайлы екенін оқырман жақсы біледі деп ойлаймын. Әрине, толық аты-жөнімен мақала ашқан дұрыс, алайда мақала жазғанда біраз қолды байлайды, көп тұлғаның әкесінің атын білмегендіктен, сілтеме жасайтын кезде таппай отырамыз.
Қысқасы, менікі ұсыныс қой. Атын және тегін жазып, мақала аша берсек дұрыс болар еді. Ал жоғарыда айтқанымдай, аттас және фамилиялас тұлғалар шығып жатса, онда атауын өзгерту аса қиын емес қой.