Иван Игнатьевич Суптель

Иван Игнатьевич Суптель(26.10.1919, Ресей, Новосібір облысы,Красноозер ауданы,Зубково селосы - 18.11.1975, Павлодар облысы,Ақсу қалалық әкімдігіне қарасты Қалқаман кенті) - 2-дүниежүзілік соғысқа қатысушы, кіші лейтенант, атқыштар ротасының командирі,орыс.1937 жылы Шығыс Қазақстан облысы Глубокое кентіндегі Ертіс мыс балқыту комбинатында жұмыс істеген. 1939 жылы Кеңес әскері қатарына алынды. 1941 жылдың маусым айынан Ұлы Отан соғысының Оңтүстік-Батыс, Воронеж, 1-Украина майдандарында ұрыстарға қатысты. 1943 жылы кіші лейтенанттар курсын бітіріп, взвод, рота командирі болды. Төрт рет жараланып, қайтадан әскер қатарына қосылды. 1943 жылы тамыз айында Полтава облысы,Пирятин қаласын азат ету кезінде Суптельдің ротасы қалаға бірінші болып кіріп, жаудың мықты бекінісіне айналған бірнеше ipi ғимараттарды жаудан тазартты. 1943 жылдың 24 қыркүйегінде балықшы қайығы мен сал арқылы Суптель ротасы Днепр өзенінен өтгі. Ротаның тең жартысы оққа ұшты. Өзеннің оң жағасына өтіп, Киев облысы,Кагарлык ауданы,Балыко-Щучинка селосын жаудан тазартты. Рота командирі Суптельдің ротасы алты күн бойы жаудың танк, артиллерия, әуе шабуылына төтеп берді. Өзі жараланғанына қарамастан, ротаны ұрыс аяқталғанша басқарды. 1943 жылы Киевті азат ету және қорғаныс жасау операцияларына қатысты. Осы жылдың 22 қарашасында Житомир қаласының шығыс жағындағы шайқастардың бірінде 5-рет ауыр жараланып, госпитальда болды. Жаумен шайқастағы ерлігі мен батылдығы, әскери тапсырмаларды орындау кезіндегі ротаны шебер басқара білгендігі үшін КСРО Жоғарғы Кеңесі Төралқасының Жарлығымен Суптельге Кеңес Одағының Батыры атағы және Ленин ордені, «Алтын Жұлдыз» медалі берілді (24.10.1943). Соғыстан соң Қазақстанға оралып, Ертіс полиметалл комбинатында, Бұқтырма ГЭС-інде, Ертic - Қарағанды каналының құрылысында жұмыс істеді. l-дәрежелі Отан соғысы орденімен, бірнеше медальдармен марапатталған. Қалқаман кентінде Суптель атында көше бар.