Бұл балалардың далада түрегеп жүріп ойнауына әрі ойлауына лайықталған, ой-есебімен байланысты ойын.
Ойынға қатынасушылар тегіс, тақыр жерді таңдап алады да (қазіргі кезде асфальтқа да) бес жұлдыздың формасына ұқсас сызба сызады Сызбадағы кесінділердің қиылысқан жерлерінде 10 нүкте пайда болады. Бұдан кейін он нүкте белгіленген жерден 10 шұңқыр ұялар қазылады (немесе дөңгелек шеңберлер сызылады).
Ойын тәртібі мынадай: ойын басталғанда ойыншы қолында тоғыз құмалақ (тас) болады да, оларды бір-бірлеп отауларға (шұңқырларға немесе шеңберлерге) орналастырып шығады. Құмалақтарды әр отауға түсірудің тәртібі төмендегідей: ең әуелі ойыншы кез келген отаудан бастап, сызық бойымен бір, екі, үш деп санап, екі отаудан өтіп, үшіншісіне құмалақты салады, одан кейінгілерін де осы ретпен (екеуінен өтіп үшіншісіне) түсіріп отырады. Ең соңында алғаш құмалақ салған және соңғы құмалақ түскен отаулар арасындағы отаулардың біреуінен басқасында түгелдей бір-бірден құмалақ болуы шарт, яғни, бірінші құмалақ салынған отау мен соңғы құмалақ түскен отаудың арасындағы бір ғана отау бос қалуы керек. Мұнда ойыншы тапқырлығы құмалақ салатын отаулар ретін алдын ала анықтаушылық қабілетіне орай сарапталатыны өзінен-өзі айқын.
Ойын балалардың логикалық ойларын жетілдіре түсуге, тез шешім қабылдау қабілеттерін арттыруға негізделген.
