Галузо отынкескіш қоңызы

Галузо отынкескіш қоңызы - саны азайып бара жатқан, сирек кездесетін түр. Азияның қуаң аймақтарына тән туыс өкілі. Таралу аймағы өте тар. Тек Үлкен Қалақан және Аяқ Қалқан маңындағы тау етегі құмды шөлінен табылған. Дернәсілі әлсіреген және қураған қылша (Ephedra lomatolepis) сабағының түбі мен тамырында дамиды. Ересектері мамыр соңы мен маусымда белсенді, үнемі қоректік өсімдігінде кездеседі, қосымша қорегі - жасыл өркендер. Қоңыздың негізгі қорек өсімдігі - қылшаны орынсыз дайындау түрдің азаюына әсерін тигізіп отыр. Түр Ұлттық табиғи бақ "Алтынемелде" қорғалады.

Пайдаланылған әдебиеттер

"Ғажайып омыртқасыздар. Қазақстан Қызыл кітап беттерінен" - Алматы: Алматыкітап баспасы, 2009