Наурыз өлеңдері

Наурыз өлеңдері-қазақтың маусымдық фольклорына енетін үлгілер, жаңа жылға арналған құттықтау, тілектер. "Наурыз"-парсы тілінде "жаңа күн" деген сөз, яғни жаңа жылдың бірінші күні. Қазақта наурыз-ай аты, басталуы наурыздың 22-іне - күн тоғысына сәйкес келеді. Сол күні жұрт бір-бірімен құшақтасып көріскен, "Ұлыс оң болсын, ақ мол болып, қайда барса, жол болсын", "Ұлыс береке берсін, бәле-жала жерге енсін", "Ұлыс бақты болсын, төрт түлігі ақты болсын" дескен, наурыз көже ішіскен. Көжеге су мен тұздан басқа жеті түрлі дәм салынатын. Оның ең бастылары ақ (сүт, айран) және қызыл (қыстан қалған сүр, соғымның шекесі) болатын. Мейрам күндері (3-4, кейде 7-10 күн аралығы) көкпар тартылып, әр-түрлі ойын-сауық, тамашалар болып, өлең айтылған. Наурыз өлеңдері тұрмыс-салтқа байланысты ертеде қалыптасқан. Қазіргі кезде жаңғыртылып, жаңаша айтылып жүр.