Дандай Ысқақұлы

Дандай Ысқақұлы (27.5. 1946 ж. т., Отырар ауданы Қоғам аулы) – әдебиетші ғалым, филология ғылым докторы (1995), профессор (1996) ҚР Гуманитарлық ғылымдар академиясының академигі. ҚазМУ-дың филология факультетін (1969), ҚР ҰҒА М.Әуезов атындағы Әдебиет және өнер институтының аспирантурасын (1974) бітірген. 1975 – 77 ж. Қазақстан ҒА Әдебиет және өнер институтында кіші ғылым қызметкер, 1977 – 87 ж. ҚазМУ-дың журналистика факультетінде аға оқытушы, доцент, 1987 – 88 ж. филология факультетінде доцент қызметтерін атқарды. 2000 жылдан Л.Гумилев атындағы Еуразия университетінде қызмет істеді. Қазір С.Демирел атындағы университеттің проректоры. Қазақ әдеби сынының тарихы, теориясы мәселелеріне арналған «Стиль сыры» (1977), «Дәстүр және жаңашылдық» (1980), «Әдеби-көркем сын» (1985), «С.Мұқанов тағлымы» (1990), «Қансонар» (1993), «Сын шын болсын» (1993), «Жанр» (1996), «Әдебиет өрнектері» (1996), «Мұхтар Әуезов әлемі» (1997), «Мұхтар Әуезов хақында мақалалар» (Анкара, 1997), «20 – 30 жылдардағы қазақ әдебиеті» (1997), «Мұхтар Әуезов: Талант пен тағдыр» (1997) атты еңбектері жарық көрді.

Cілтемелер

"Оңтүстік Қазақстан облысының энциклопедиясы"