Іс-әрекет

Іс-әрекет – адамның дүниемен қарым-қатынас тәсілі. І.-ә. барысында адам табиғатты, қоршаған айналаны игеріп, шығарм. тұрғыда өзгертеді. Сөйтіп, өзін іскер, жасампаз субъект ретінде қалыптастырады, ал өзі игерген табиғи ортаны І.-ә. объектісі етеді. Адам І.-ә. үстінде кез келген затқа жат пиғылмен қарамайды. Керісінше осы заттың табиғаты мен ерекшеліктеріне ой жүгіртіп, игереді, сондай-ақ өз іскерлігінің өлшемі мен мәні етеді. І.-ә. барысында адам табиғатпен өзара әрекетте болып қана қоймайды, оны бірте-бірте өзінің материалдық және рухани мәдениетінің құрамына кіргізеді. Сыртқы дүниені өзгерту адамның өзін дамытуы үшін қажетті жағдай және алғышарт болып табылады. І.-ә. тұтас процесс қарым-қатынаспен тығыз байланыста және болашақ ұрпаққа бағытталған әлеум. сабақтас белсенді құбылыс болып табылады. Адамдардың І.-ә-і әрдайым бұрын жасалған дәлелді алғышарттар мен белгілі бір қоғамдық қатынастардың негізінде жүзеге асады. Сол себепті ол нақты тарихи сипатта, нақ осы әлеум. шындықтың өмір сүру тәсілі болып табылады. І.-ә-тің филос. ұғымының барлық әлеум. ғылымдар, әсіресе, психология, социология, педагогика, т.б. үшін маңызды дүниетанымдық және методол. мәні бар.

Пайдаланылған cілтемелер

М. Сәбит