– Киностудияға алғаш барғанымда тыста отырсам, менің ауылдан келгенімді байқағандықтан ба, кейбір жанымнан өткен адамдар «мамбет» дегендей намысыма тиетін сөздер айтып өтетінін байқадым. Содан ызаға булығып, Шәкен ағаға барып: «мен киноға түспеймін, қайтамын» дедім. Шәкен аға менің не нәрсені көңіліме алғанымды бірден ұқса керек, «елдің сөзіне құлақ асып қайтесің, құлағыңа мақта тығып жүр. Көп сөйлемей, киноға түсесің, дайындал» деп райымнан қайтарды. Бұл «Ән қанатында» фильміне дайындық кезіндегі оқиға болатын.
Расында, алғаш «Тақиялы періштенің» сценарийін оқығанымда өзіме көп ұқсастық көрдім. Егер мүлде кереғар адам болсам, мүмкін, рөлді ойдағыдай алып шыға алмас па едім, кім білсін?! — дейді Тайлақтың рөлін сомдаған Әлімғазы Райымбеков.
