Күләш Дүйсенбайқызы Қаймулдинова

Күләш Дүйсенбайқызы Қаймулдинова - (25.7.1966 жылы туылған, Шығыс Қазақстан облысы Үржар ауданы) – география ғылымдарының докторы (2010). ҚазПИ-ді (1988, қазіргі ҚазҰПУ) бітірген. 1988–2006 жылдары ҚазПИ-де оқытушы, аға оқытушы, доцент қызметтерін атқарды. 2006 жылдан кафедра меңгерушісі. «Қазақстандағы физикалық-географиялық нысандардың номинациялануының ғылыми негіздері» деген тақырыпта докторлық диссертация қорғады. Негізгі ғылыми еңбектері Қазақстан топонимдерін география ғылымдар тұрғысында зерттеуге арналған. Ол қазақ халқының география терминдерін, топонимдердің қалыптасуын табиғатты пайдалану және қорғау дәстүрлері тұрғысында зерттеп, топонимиканы ландшафттар туралы іліммен байланыстыруды жүзеге асырған. Жалпы білім беретін мектептердің 7, 10, 11-сыныптарына арналған географиядан жаңа буын оқулықтарының, геогр. атластардың, жоғары оқу орындарына арналған оқу құралдарының авторы.