'''Ақшағыл полиметалл кені''' , [[Қарағанды облысы]]. [[Шет ауданы|Шет ауданында]] орналасқан. Бұл жерден [[1834]] – [[1918]] ж.жылы орыс және шет ел концессионерлері [[мыс]], [[қорғасын]], [[мырыш]] өндірген. Кен орны [[Балқаш көлі|Балқаш көлінен]] солтүстікке қарай созылған Тасарал – Қызылеспе антиклинорийінің шығысын алып жатыр. Мұндағы кен [[линза|линзалары]] [[ортаңғы палеозой]] гранитоидтары мен [[силур|силурдың]] жанартаутекті-терригендік және [[карбонат|карбонатты]] жыныстарының жапсарында қалыптасқан. Жапсарласу белдеміндегі тау жыныстары грейзенделген. Онда мөлшері жоғары [[вольфрам]], [[қалайы]] түзілген. Ал әктастар [[мәрмәр|мәрмәрға]] айналған жапсарда магнетит-магнезиалды скарндар пайда болған. Оларға шашыранды, сеппе не шомбал түрде кездесетін [[полиметалл]] кентастары шоғырланған. Кентасты минералдардан [[халькопирит]], [[галенит]], [[сфалерит]], [[пирит]] және [[висмут]] пен [[күшәла]] минералдары, ал [[бейметалл]] минералдардан [[гранат|гранаттар]], [[пироксен|пироксендер]], [[эпидот]], [[везувиан]], [[кальцит]], [[кварц]] бар. Тотығу белдемінің минералдарынан [[малахит]], [[хризаколла]], [[брошантит]], [[каламин]], [[смитсонит]] кездеседі. Ақшағыл полиметалл кені барланған қорының аздығына байланысты өндіріске қосылмаған.
<ref>Қазақстан Республикасының табиғаты туралы энциклопедия, V- том</ref>