Семей мұғалімдер семинариясы

СЕМЕЙ МҰҒАЛІМДЕР СЕМИНАРИЯСЫ — Қазақстандағы алғашқы арнаулы орта оқу орындарының бірі. 1903 ж. 1 шілдеде үш негізгі және бір даярлық класы бар жеті жылдық оқу орны болып ашылды. Оның дайындық класына алғаш Семей, Кереку, Өскемен, Қарқаралы, Ақмола уездерінен 24 бала қабылданды. Кейіннен Тобыл, Барнауыл, Жетісу аймақтарынан да жастар тартыла бастады. Семинарияның алғашқы директоры болып Петербург ун-тінің түлегі А.И. Белый тағайындалды. Семинария іргетасының бекуіне жоғары білімді педагогтар — ағайынды Белослюдовтар, Н.Я. Коншин, И.Я. Малахов, В.Н. Попов, ерлі-зайыпты Нұрғали, Нәзипа Құлжановтар, Ә.Сәттаев, т.б. зор үлес қосты. 1922 ж. семинария негізінде орысша және қазақша екі пед. техникум ашылып, 1937 ж. пед. уч-щелер болып өзгерді. 1953 ж. екі уч-ще біріктіріліп, К.Д. Ушинский атынд. орыс-қазақ пед. уч-щесі болды. 1957 — 63 ж. уақытша жабылып, Семейдегі Н.П. Крупская атынд. пед. ин-ттың бастауыш мектеп мұғалімдерін даярлау ф-ті ретінде жұмыс істеді. 1963 ж. пед. уч-ще болып қайта бөлініп шықты. 1967 ж. М.Әуезовтің есімі берілді. 1992 ж. 22 мамырда пед. колледжге айналды. Қазір колледждің күндізгі және сырттай оқу бөлімінде 5 мамандық (бастауыш сынып, шағын комплектілі бастауыш мектеп, музыка, ағылшын тілі, информатика пәні мұғалімдері) бойынша 1500 оқушы білім алуда. Онда озық үлгідегі тех.-компьютерлік құралдармен жабдықталған 4 информатика кабинеті, спорт және салтанат залдары, жазғы стадион, 63 мың дана оқу құралдары бар кітапхана, жақсы жабдықталған жатақхана мен асхана жұмыс істейді. Оқу орнын бір ғасыр ішінде 45 мыңнан астам мамандар бітіріп шыққан. Олардың арасында Әуезов, Қ.Сәтбаев, Ә.Марғұлан, Ж.Аймауытов, Ә.Нұршайықов, А.Құдайбердиев, Ғ.Сармұрзин, Ш.Айманов, т.б. бар. Әуезовтің “Еңлік — Кебек” пьесасы осы оқу орнының қабырғасында дүниеге келген. Сондай-ақ 1918 ж. Әуезов пен Аймауытов семинарияда оқып жүріп, “Абай” атты қолжазба журнал шығарған, осында қазақ топырағындағы алғашқы студент-жастардың футбол командасы “Ярыш” құрылған. Студенттер Семейдегі А.В. Луначарский атынд. клубта жастардың ойын-сауық кештерін ұйымдастырып, Абай шығармалары мен халық әндерін, күйлерін насихаттаған (ұйымдастырушылары семинария оқытушылары, ерлі-зайыпты Құлжановтар).