Покровский Сергей Николаевич

Покровский Сергей Николаевич (26.12.1900, Малоярославец қ. Калуга губ. — 25.10.1978, Алматы) — ғалым, профессор (1934), тарих ғылымының докторы (1946), Қазақстан ҒА-ның академигі (1951), Қазақстанның еңбегін сіңірген ғылым қайраткері (1947). 1920 — 35 ж. Украинада партия, кеңестік жұмыстарда, ғылыми-пед. қызметтерде болды. 1935 — 37 ж. Челябинскіде облысы прокурордың, 1937 — 39 ж. Қазақ КСР-і прокурорының орынбасары, 1939 — 45 ж. ҚазМУ-де (қазіргі ҚазҰУ) профессор, кафедра меңгерушісі және проректор, 1945 — 62 ж. Қазақстан ҒА-ның Ш.Уәлиханов атындағы Тарих, археология және этнография институтында аға ғылыми қызметкер, бөлім меңгерушісі, директор қызметтерін атқарды. Покровскийдің ғылыми еңбектері негізінен Қазақстандағы азамат соғысы тарихына арналған. Покровский — “Қазақ КСР тарихы. Социализм дәуірі” (қазақ, орыс тілдерінде, 1963, 1967) атты ұжымдық еңбек авторларының бірі. Оған “Разгром иностранных военных интервентов и внутренней контрреволюции в Казахстане” (1967) атты еңбегі үшін Қазақстан ҒА-ның Ш.Уәлиханов атындағы сыйлығы берілді (1970). Покровский “Октябрь революциясы”, Еңбек Қызыл Ту, 2 рет “Құрмет белгісі”, “Халықтар достығы” ордендерімен, медальдармен марапатталған.

Пайдаланылған әдебиет

“Қазақ Энциклопедиясы”, VII-том