Табылдиев Әбдібай

Табылдиев Әбдібай (2.2.1926 жылы туылған, Тұрар Рысқұлов ауданы, Жаңатұрмыс ауылы) – ақын, жазушы, драматург, ұстаз ғалым, педагогика ғылыми кандидаты. 1948 жылы Тараздағы Абай атындағы педагогикалық училищені, 1955 жылы ҚазПИ-ді бітірген. Еңбек жолын 1944 жылы Т.Рысқұлов ауданында мұғалім болудан бастаған. 1944 – 46 жылы әскер қатарында қызмет етті, 1946 – 68 жылы Жаңатұрмыс ауылындағы орта мектепте мұғалім, оқу ісінің меңгерушісі, мектеп директоры, 1968 – 80 жылы «Қазақ энциклопедиясы» бас редакциясында редактор, 1980 жылдан Қазақ мемлекеттік университетінде оқытушы, профессор Табылдиев 1959 жылы шыққан «Бөбекке сөз» жинағынан бастап 2000 жылы жарық көрген «Қайырлы таң, балалар» атты жинағына дейінгі аралықта балаларға арнап 31 кітап шығарды. Ол сатира жанрында да қалам тартып, «Қой бағу оңай ма?», «Мен кіммін, білесің бе?» деген жинақтар шығарды. Оның «Алыптардың алыбы», «Бәрекелді, Кірпі», «Ғажайып бақ» ертегі пьесалары республикалық қуыршақ театрында қойылды. Ғылыми еңбектері 1965 жылдан жарияланып келеді. Оннан аса ғылыми, әдістемелік еңбегі оқушыларды, студенттерді тәрбиелеу, оқыту мәселесіне арналған. «Халық тағылымы» (1992), «Тағылым» (1995), «Қазақ этнопедагогикасының методологиясы мен этнопедагогика және мәдениеттану мәселелері» (2000) ғылыми еңбектері ғалымдар арасында жоғары бағаға ие болды.

Сілтеме

Тараз энциклопедиясы