Әбдірахман Исабаев

Әбдірахман Исабаев (9.5. 1934 жылы туған, Қазығұрт аудан(ы) Шарапхана ауылы) – ғалым, филология ғылымының докторы (1994), профессор(ы) (1997). 1952 – 57 жылдары Ташкент қаласындағы Низами атындағы педагогикалық институттың тарих-филология факультеті қазақ тілі мен әдебиеті бөлімін бітірген. Институтты тәмамдаған соң сонда қызметте қалып, 40 жыл бойы аға оқытушы, доцент, профессор(ы) болып жұмыс атқарып келеді. «Фонетиканы оқыту методикасы» (1965) деген тақырыпта канд., «Қазақ тілі дыбыс жүйесі методикасының теориялық негіздері» (1994) деген тақырыпта докторлық диссертация қорғады. 200-ден астам ғылыми еңбектердің авторы. Оның «5 сыныпта фонетиканы оқыту методикасы» (1965), «Қазақ тілі дыбыс жүйесін оқыту методикасының негіздері» (1973), «Қазақ тілін оқыту формалары» (1990), «Қазақ тілінен 4 – 5 сыныптарға арналған кестелер» (1991), «Қазақ тілінен өтілетін сабақтар» (1996), «Қазақ тілін оқыту методикасының бағдарламасы» (1996), «Қазіргі қазақ тілінің бағдарламасы» (1997), т.б. еңбектерінің теориялық, методикалық мәні зор. Ол Өзбекстан Республикасы халыққа білім беру министрлігі республикалық білім орталығының түркі тілдері кеңесінің төрағасы ретінде қазақ тілі мен әдебиеті бойынша оқулықтар мен оқу құралдарын жазу тобының жетекшісі. «Бүкіл түркі елдері халықтары әліппесі» атты кітабы жарық көрген.