Шемонаиха - Жоғарғы Оба кентасты ауданы

Шемониха - Жоғарғы Оба Кентасты ауданы

Шемониха - Жоғарғы Оба Кентасты ауданы Шығыс Қазақстан облысының жерін қамтып, жіңішке танап түрінде солтүстік-батысқа созылған кенді өңір. Ол Алей антиклинорийінің ядролық бөлігі мен Секисов-Шемонаиха терең жарылымдар белдемін алып жатыр. Солтүстік-батыс және бойлық бағыттардағы көптеген қысқа жарылымдардың ірі, терең жарылымдар белдемдерімен ұштасуы кентасты ауданның геологиялық құрылысына қаңқалы-блокты кейіп беріп, жарылымдарды бойлай жасы әр түрлі гранитоид интрузияларының енуіне себепші болған. Ауданда төмен палеозойдың метаморфтық тақтатастары, ортаңғы девонның березов (эйфель), талов (живет) шоғырларының жанартаутекті-шөгінді тау жыныстары, қышқыл лавалары, туфтары, туффиттері, туфтық құмтастары, алевролиттері тараған. 80-нен астам кен денелері орналасқан бұл аудан солтүстік-батыстан оңтүстік-шығысқа қарай төрт кентасты алаңға (Орловка, Шемонаиха-Ефимов, Опенышев, Жоғарғы Оба) бөлінеді (қ. Орлов мыс кені). Ауданның біршама ірі кендері жарықшалы-метасоматикалық белдемдердің құрылымдық-генетикалық типіне жатады.

Пайдаланылған әдебиеттер

• Қазақ энциклопедиясы, 9 том