Қайшылықты құқық

ҚАЙШЫЛЫҚТЫ ҚҰҚЫҚ – әр түрлі мемлекеттер заңдарының арасындағы қайшылықтардың шешімін табатын нормалардың жиынтығы. Әрбір мемлекеттің қайшылықты нормаларының жиынтығы оның Қайшылықты құқығы болып табылады. Осы мағынада ол ұлттық сипат алады. Қайшылықты құқық халықаралық жеке құқықтың құрамына кіреді және оның тарихи негізі әрі ұйтқысы болып табылады. Кейбір елдерде (мыс., Ұлыбританияда, АҚШ-та) халықар. жеке құқық ұғымы Қайшылықты құқық ұғымымен мәндес. Қайшылықты құқық көздері жалпы құқыққа тән барынша алуан түрлі нысандарда көрініс табуы мүмкін. Көп жағдайда Қайшылықты құқық “жазылған құқық” актілерінде – заңдарда, заңнан туындаған актілерде, сондай-ақ, халықаралық келісімшарттарда тұжырымдалған. Сонымен қатар, түрлі елдерде қайшылықты-құқықтық реттеу нормалары тиісінше сот шешімдерінде де, ғұрыптарда да баяндала береді.