Алексей Матвеевич Степанов

Степано Алексей Матвеевич (19.1.1923, Пенза облысы Пенза аудандағы Чемодановка селосы – 6.10.1989, Алматы) – қазақстандық кескіндемеші. Қазақстанның халық суретшісі (1988). 2-дүниежүзілік соғысқа қатысқан. 1933 жылы Пенза көркемсурет училищесін, 1952 жылы Ленинградтың (қазіргі Санкт-Петербург) кескіндеме, мүсін және сәулет өнері институтын бітірген. Сол жылдан бастап Алматы қаласында жұмыс істеді. Ол бірқатар пейзаждардың (“Бейбіт дала”, 1965; “Көктемгі Алатау”, 1969; “Бейбіт Алматы”, 1980), натюрморттардың (“Раушангүлдер”, 1955; “Күз”, 1963), портреттердің (“Р.В. Великанованың портреті”, 1959; “Раушан”, 1962; “Л.Долгушинаның портреті”, 1973; “Бейбітшілік туралы толғау”, 1980), тақырыптық картиналардың (“Қазақстан Магниткасы”, 1973; “Еңбек күндері”, 1974; “Күміс еңлікгүл”, 1977; “Медеудегі жексенбі”, 1978) авторы. Степано айналадағы өмір, дүние поэзиясын бейнелеуде асқан шеберлік көрсетті, сонымен қатар ғарыш тақырыбына (“Жұлдыздарға”, 1965 – 67; “Жер планетасынан самғаған адам”, 1969; “Жұлдызды аспан”, 1971; “Ғарышқа”, 1977; “Біз Байқоңырданбыз”, 1979; “Интеркосмос”. “Ғарыш туралы әңгіме”, 1984) ерекше назар аударды. Республика, бүкілодақтық, халықар. көркемсурет көрмелеріне ұдайы қатысқан. 2-дәрежелі Отан соғысы орденімен және медальдармен марапатталған.

Әдеб.: Габитова М., Алексей Степанов, Мастера изобразительного искусства Казахстана, А.-А., 1972.