Тон қаған

Тун жабғу, Тон (Түн) Жабғу, Тун Шегу хан (туған жылы белгісіз – 627) – Батыс Түрік қағандығының билеушісі (619 – 27). Шегуй (Шегуй-хан) қағанның інісі. Ағасы қайтыс болғаннан кейін қағандықтағы билікті өз қолына алды. Ордасын Мыңбұлақ (Цянь-цюань) деп атайтын жерге көшіреді. Әскерін жүз мыңнан асырып, теле тайпасын бағындырып, Иранды жаулап алуға қол жеткізді. Қол астындағы иеліктерге жаңа басшылар тағайындап, оларға сылифа деген титул берді. Сылифалардың іс-әрекетін қадағалап отыруды арнайы белгіленген ақсүйектерге тапсырды. Қытай императорымен жақсы қарым-қатынас орнатып, оған қымбат сыйлықтар жіберіп тұрды және онымен Шығыс Түрік қағандығына қарсы бірлесе күресу жөнінде келісім жасады. Алайда мұндай келісім көп ұзамай Тун Жабғудың өзінің туысы Мохэдудың (Сыби хан Мохеду) қолынан қаза табуына байланысты жүзеге аспай қалды.