Туф

Туф (итал. tufo) – шығу тегі әр түрлі тау жыныстарының тобы. Туфтағы шөгінді материалдардың мөлшері 10%-дан аспайды. Туфтың жанартаулық-кремнийлі және әктасты Туф (травертин) деп аталатын түрлері бар. Сынықтар жанартаулық шыныдан, минералдардан, эффузиялық тау жыныстарынан құралған. Оларды көбінесе хлорит, эпидот, кальцит, цеолиттер керіштейді. Құрамы бойынша Туфтар базальттық, андезиттік, дациттік, риолиттік, трахиттік, фонолиттік, сілтілі базальттық болып келеді. Түсі әр түрлі; бітімі шомбал, ағынды, кеуекті, жолақты. Құрылымы псефиттік, псаммиттік, алевриттік, пелиттік. Туфтар құрылыс материалы ретінде цемент және шыны өндірісінде, бетонның толықтырғышы ретінде, т.б. қолданылады. Туфтар Қазақстанда кеңінен таралған.