|
[[Санат:Мемлекет]]
[[Санат:Қазақстан]]
[[Санат]]
'''ЕРТЕҢІ ЖАРҚЫН ЕЛОРДА
'''
Атырау мен Алтай арасында жатқан құрыш білекті, жолбарыс жүректі Қазақ елі – бар қазақтың табанын тірер тұрағы, арқа сүйер асқары болса, Астана сол елдің жүрегі.
“Біз қазақ деген мал баққан елміз, бірақ ешкімге соқтықпай, жай жатқан елміз. Елімізден құт-береке қашпасын деп, жеріміздің шетін жау баспасын деп найзаға үкі таққан елміз. Ешбір дұшпан басынбаған елміз, басынан сөз асырмаған елміз. Досымызды сақтай білген елміз, дәм-тұзымызды ақтай білген елміз”, – деп Қаз дауысты Қазыбек би айтпақшы, еліміз кәрі тарихтың қандай қаһарынан да, талай тар жол, тайғақ кешулерден де аман өтті. Ойсыраған ортамыз оңалды, түскен еңсеміз көтерілді. Жұмылып жұдырық, ашылып алақан болуының арқасында ата-бабаларымыздың арманы болған тәуелсіздікке қол жеткіздік. Береке-бірлігімізден, ірілігімізден айырылған жоқпыз. Еркіндік пен азаттыққа қол жеткізген Тәуелсіз елдің ұлы істерінің бірі – Еуразияның жүрегінде еліміздің байтағы Астанамыз салынып, Ақордамыздың тігілуі болатын.
Он бір жыл бұрын Елбасымыз Нұрсұлтан Назарбаев бас болып, қалған елі қостап ел ордасы Алатаудан Сарыарқаға көшкен болатын. Бұл ұлы оқиға қазірдің өзінде, тарих үшін он бір жыл қас-қағым сәт те болса, уақыт қойнауының беттеріне, дәлірек айтсақ Қазақ елінің шежіресіне, мемлекет жылнамасына алтын әріппен жазылар ұлы істер еді. Міне, сол Елбасының батыл қадамының нәтижесін күн санап емес, сағат санап көріп, сүйсінудеміз.
Сұлулығы мен ажары, сәні мен салтанаты жастығына қарамастан әлемнің мың жылдық тарихы бар астаналарымен қатар аталып, иықтас тұрған байтағымыз Астана тәуелсіздігіміздің тірегі, ел мерейінің асқақ шыңы. Өйткені, Астана азаттық алған еліміздің өз қалауы. Елдігімізді көрсеткен, ерлігімізді көрсеткен елдің жаңа байтағы. Астана – ел болып жұмылудың арқасында тұрғызылған, елдегі ауызбірлік пен татулық салтанатының белгісі.
Көзге де, көңілге де ыстық Астана әр адамның жан дүниесін тебірентіп, қанын тасытып, іңкәрлік пен сүйіспеншілік сезімге бөлейді. Қазақтың арман, қиялын асқақтатқан небір сәулет өнерінің озық туындылары осында туындады. Талайды таңғалдырған озық сәулет жауһарлары осында асқақтады. Дамудың даңғыл жолына шыққан Астананың символына айналған Бәйтеректен бастап айтатын болсақ, мұндағы көк тіреген сұлу ғимараттар қаншама... Оларды атай отырсақ, жер жүзінде мәңгілік символы деп танылатын ежелгі пирамида кейпінде адамзат баласын бірлік пен татулыққа шақырған Бейбітшілік пен келісім сарайы, бүкіл қазақ мемлекеттігінің шежіресі мен қуатын бойына жинаған көк тіреген “Қазақ елі” монументі. Бұрын тек шетелдік кинолардан ғана көретін көкке шаншылған сұлу ғимараттар... Мұның бәрі көзбен көріп, көңіл қуантып тұрған көріністері ғана, ал Астананың нағыз мәні мен маңызын тарих пен болашақ ұрпақ қана беретін шығар сірә...
Саяси-экономикалық, мәдени-әлеуметтік тұрғысынан жедел дамып келе жатқан, діни татулық пен тұрақтылықты ту етіп көтеріп келе жатқан Астанамыздың атағы әлемге жайылуда. Астанамызды теледидардан көріп-біліп отырған Отанымыздың әрбір тұрғыны адам қолымен тұрғызылған керемет ғажайыптарды өз көзімен көріп, тамашалауға ынтық. Бағаналы ордамыздың сұлу сипатын өз көзімен көруге құштар бір қауым ел киелі Маңғыстауды мекен қылғандар арасында да баршылық. Елдің ең батысына орналасқан Маңғыстау мен Отанымыздың жүрегі – Арқа төріндегі Астана арасын екі мың шақырым бөліп жатса да, бүгінгі таңда бұл қашықтық сезілмейді де. Ата-бабамыз айшылық жолды атпен кесіп өтсе, оның бүгінгі ұрпақтары қазіргі заман жетістіктерімен екі-үш-ақ сағатта барып-келуде. Соңғы жылдары Маңғыстау-Астана бағытында ашылған жүрдек пойыз еліміздің екі қиырындағы ағайындардың қарым-қатынасына қызмет етуде.
Астана – жастар қаласы. Онда еліміздің түкпір-түкпірінен келген жастар елдігіміз бен ерлігімізді нығайтқан бас ордамыздың өркендеуіне үлес қосуда. Оның ішінде Маңғыстау жастары да ойып тұрып орын алады. Жыл сайын Астана қаласына Маңғыстаудан үкілі үміт арқалап жүздеген бала оқуға келеді. Білім мен ғылымның ордасына айналған Астананың құшағы кең байтақ еліміздің қай түкпірінен келмесін, білім қуған қай ұланына да ашық.
Астананың айшықты сән-салтанаты бүкіл елдегі сәулет өнерінің дамуына алып келді, бүкіл қазақстандықтардың санасының сілкініп түлеуіне себеп болды, баршамызға рух, дем берді. Астана – әр қазақ баласының жүрегіндегі мақтанышы, көзіндегі қуанышы. Ендігі жерде осы мақтанышымызды одан әрі қарай өсіріп, әрі қарай өркендету – баршамыздың парызымыз. Еліміздің ауызбірлігі мен үйіміздегі татулық қана біздің жарқын дамуымыздың кепілі. Ауызбірлік бар жерде ғана тауды қопарып, тасты бұза аламыз. Елбасы Н.Ә.Назарбаевтың “Ең қиын жылдары біз салуды бастап, елдің жаңа байтағын – Астананы салдық, біз осыны ешкім сенбеген кезде тұрғыздық. Біз осыны жасадық, мұны әлем көріп отыр...” деген сөздері Астананы тұрғызған қазақстандықтардың қажырлы еңбегі мен осы ұлы істің айналасына айрандай ұйып топтасқан отандастарына сүйсінгендіктен берген бағасы болар.
Қазір барша қазақстандықтар – тағдыры бір халық. Бүгінгі еліміз жеткен жетістіктер барлық қазақстандықтардың жеңісі. Біз бірге болғанда ғана асқар шыңдарға шығып, биігінен көрінеміз. Біз бірге болғанда ғана кемел келешектің үкілі үмітіне айналамыз. Ендеше, бірлікте болайық! Ата-бабаларымыз бірлік болмай, тірлік болмас деп бекер айтпаған шығар, сірә.
Басты орда, күллі қазақ баласының арманын ту етіп тіккен Сарыарқаның төріндегі ару Астананың, ертеңі жарқын елордамыз – Астананың тойы тек астаналықтарға ғана емес, баршамызға ортақ қуаныш! Ортақ қуаныштарымыз баянды болғай!
|
