'''Ақсу 1''' – Алматы облысы Ақсу, [[Алакөл]] аудандарынғы өзен. [[Жетісу]] Алатауының 4000 м. биіктікте орналасқан мұздықтарынан бастау алып, [[Балқаш]] көліне құяды. Ұзынды-қысқалы 132 саласы бар. Ақсудың ұзындығы 316 км, су жинау алабы 5040 км<sup>2</sup>. Көпжылдық орташа су шығыны [[Жансүгіров]] кенті тұсында 11,2 м<sup>3</sup>/сек. Өзен жоғарғы ағысында тауаралық [[Қапал аңғары]]н кесіп өтіп, жазыққа шыққан соң көптеген саяз тармақтар мен арналарға бөлініп кетеді. Төменгі ағысында тарамдар, өзектер, көлдер мен [[батпақ]]тар құрай отырып, Балқаш маңы жазығын кесіп өтеді. Өзен алабының мұз құрсану аумағы 139 км<sup>2</sup>, көлемі 0,77 км<sup>3</sup> болатын 162 мұздық бар. Негізгі салалары: [[Сарқан]], [[Қожамберді]] өзендері. Ақсу шаруашылыққа пайдалануға байланысты Балқаш көліне жетпей суын құмға жоғалтады. Суы көктем мен жазда тасиды, осы кезеңде жылдық ағындысының 80%-і өтеді. Суы тұшы, минералд. 0,2-1,5 г/л аралығында ауытқиды. Минералдары химиялық құрамы жағынан [[гидрокарбонат]] класының кальций және магний тобына жатады. Суы егін, мал суаруға және техн. қажеттіліктерге пайдаланылады.
