Ізгілік көмек

Ізгілік көмек - басқа елдер мен аймақтардың жеке адамдары тарапынан мұқтаж халыққа (мыс.‚ табиғат апатынан зардап шеккен халыққа) көрсетілетін өтеусіз көмек; мемлекетке, мемл. билік пен жергілікті өзін-өзі басқару органдарына, заңды және жеке тұлғаларға шет мемлекеттер, халықар. және шетелдік мекемелер немесе коммерц. ұйымдар беретін жәрдем, сондай-ақ солар үшін өтеусіз жәрдем ретінде тегін орындалатын жұмыстар мен ақысыз көрсетілетін қызметтер. Ізгілік көмек тех. көмек пен ізгілік жәрдем түрлеріне ажыратылады. Техникалық көмек экон., әлеум. реформаларды жүзеге асыруға қолдау көрсету, конверсиялау, қару-жарақ пен әскери техниканы кәдеге жарату, ядролық отынның қалдықтарын, атом энергиясын бейбіт және әскери мақсатта пайдалану кезінде қордаланып қалған радиоактивті қалдықтарды жою жөніндегі радиац.-экол. шараларды жүзеге асыру мақсатымен, сондай-ақ үкімет белгілеген тәртіппен тіркелген жобалар мен бағдарламалар бойынша оқыту, зерттеулер жүргізу, мамандар, аспиранттар, студенттер алмасу, тәжірибе, технологиялар, жабдықтар мен басқа да материалдық-тех. құралдар беру мақсатымен көрсетіледі. Ізгілік жәрдем жағдайы төмен, әлеум. жағынан қорғалмаған, табиғат апатынан, басқа да төтенше оқиғалардан зардап шеккен жұртшылыққа мед. және әлеум. жәрдем көрсету, осы көмекті тасымалдауға, жеткізіп беруге, сақтауға жұмсалатын шығынды көтеру үшін беріледі. Акцизделетін тауарларды тегін ізгілікті және тех. көмекке жатқызуға болмайды. Тех. көмек жобалары мен бағдарламаларын тіркеу нысаны мен тәртібін, Ізгілік көмек көрсету тәртібін, сондай-ақ тех. көмек пен қаражатын пайдалану тәртібін үкімет белгілейді. Ізгілік көмек қаражатын толық немесе ішінара сатуға тыйым салынған. [1][2]

Ортаққорда бұған қатысты медиа санаты бар: Humanitarian aid

Дереккөздер өңдеу

  1. Қазақ Энциклопедиясы, 9 том
  2. Орысша-қазақша заңдық түсіндірме сөздік-анықтамалық. — Алматы: «Жеті жарғы» баспасы, 2008 жыл. ISBN 9965-11-274-6