Валентин Кузьмич Андрусенко

Валентин Кузьмич Андрусенко (8.3.1919, Ресей, Орынбор облысы Новосергиев ауданы Покровка с. - 22.3.1979, Алматы қ.) - екінші дүниежүзілік соғысқа қатысушы, бөлімше командирі, старшина. Украин.

1939 ж. Кеңес әскері қатарына шақырылып, әскери-теңіз флотына жіберілді. Балтық флоты әуе күштеріне қажетті кіші дәрежелі мамандарды дайындайтын мектепті бітірген. Ұлы Отан соғысы басталғанда Балтық т. 1-мина-торпедалық әуе полкінде ұшақтарды бомбалау және оларды атыс қаруымен үздіксіз қамтамасыз етудің шебері болды, сонымен қатар кейде әуе атқышы қызметін де атқарды. 1943 жылдың қазанында теңіз жаяу әскері қатарына ауыстырылды, кезекті бір ұрыста жарапанып, госпитальға түсті. Кейін күзет катерлері 2-дивизионы СКА-65 катерінің бөлімше командирлігіне тағайындалды. 1944 ж. 17 маусымда Андрусенко автоматтан «Юнкере Ю-88» бомбалаушы ұшағын атып түсірген. Теңізшінің қайсарлығы, әсіресе, Моонзун топаралдарына десант түсіруде ерекше байқалды: ол 1944 ж. 3 қыркүйекте Даго аралына 10 сапар жасап, жаудың бірнеше отты нүктелерін жоюға қатысса, ал Эзель аралы үшін болған ұрыста шхуна командирі ретінде жанып жатқан оқ-дәрі запасын сыртқа лақтыра отырып, десантшылар мен шхунаны аман сақтап қалды. Даго (Хий-умаа) және Эзель (Сааремаа) аралдарына десант түсіру барысында көрсеткен ерлігі үшін Андрусенкоға Кеңес Одағының Батыры атағы берілді (6.3. 1945).

Андрусенко 1946-79 ж. Алматы қаласында тұрды. Оның есімі Ленинградты ерлікпен қорғаушылардың естелік тақтасында жазылған. Ленин ордені және «Жауынгерлік ерлігі үшін», «Ленинградғы корғағаны үшін», т.б. медальдармен марапатталған.[1]

Дереккөздер өңдеу

  1. Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет.ISBN 9965-893-73-Х