Ақшабаев Намазбай

Ақшабаев Намазбай (1897, Жамбыл ауданы, Қостөбе ауылы - 1937, Тараз қаласы ) – қоғам қайраткері. Жасынан Әулиеата қаласындағы әскери гарнизон бастығының бес жылдай ат айдаушысы болып істеген. Ақшабаев өз бетімен қазақша-орысша сауатын ашып, екі тілде бірдей таза сөйлейтін болған. Әулиеата уезіндегі 1916 жылғы көтеріліске қатысады. Ұсталып, қолға түскеннен соң, сотталудын құтылу үшін майданның тылдағы қара жұмысына аттанады. Майданнан оралған соң, Ташкенттегі Қызық Әскер командирлерін даярлайтын қысқа мерзімді курсты оқып, азамат соғысына қатысады. 1918 жылы БК(б)П қатарына өтеді. 1919 жылы Қостөбеде партия ұйымын құрып, жер реформасын жүргізуге қатысады. 1924 – 1927 жылдары уездік атқару комитеті төреағасыныныңьорынбасары болады. 1928 жылы Түркістан-Сібір темір жолын салуға қатысып, онда ағарту жұмысын жүргізумен шұғылданады. Мәскеуде темір жол халық комиссариатының жанындағы курста оқып шығып, Түрксіб басқармасы бастығының орынбасары, 1932 жылы сектор бастығы қызметін атқарады. 1933 жылы Қазақ АКСР су шаруашылығы халық комиссарының орынбасары, 1934 – 1935 жылдары Әулиеата МТС-ның директоры, 1935 – 1937 жылдары Әулиеатада аудандық партия комитетінің бөлім бастығы болады. «Халық жауы» деген жаламен саяси қуғын-сүргінге ұшырап, ату жазасына кесіледі. 1988 жылы Қостөбе ауданындағы орта мектепке Ақшабаев Намазбай есімі берілді. Тараз қаласының бір көшесі Намазбай Ақшабаев атымен аталған.