Баланстық құн

Баланстық құн — бухгалтерлік кітаптардағы негізгі қорлар мен айналым қаржыларының ақшаға шаққандағы құны (нақты нарықтық құны басқаша болуы мүмкін). Баланстағы негізгі қорды бағалау үшін бастапқы қалпына келтіру және инвентарлық құндары негізге алынады. Әдетте, негізгі қорлар баланста бастапқы құны бойынша белгіленеді. Ал, құн оны алуға, жеткізуге, орналастыруға кеткен шығындардан құралады. Кейінгі жылдардағы жаңадан қайта бағаланған қорлар баланста қайтадан бағалау кезінде белгіленген қалпына келтіру құнымен есептеледі (индексация). Күрделі қаржының есебінен алынған негізгі қорлардың инвентарлық құны көрсетіледі. Басыбайлы алынған объектілер беріп отырған жақтың бухгалтерлік есебіндегі деректер бойынша балансқа алынады. Бұл мәліметтер алыс-беріс құжатында көрсетіледі. Шикізат, негізгі және қосалқы материалдар, отын, жөндеуге қажетті бөлшектер, тауарлар, дайын өнімдер, т.б. баланста өзінің нақты құны бойынша тіркеледі. Бағасы арзан әрі тез тозатын заттар бастапқы құны бойынша көрсетіледі, ал олардың тозуы жөніндегі дерек баланстың пассивіндегі жеке бапқа жазылады.