Батыс Қазақстан Облыстық Архиві

Батыс Қазақстан Облыстық Архиві - тарихи құжаттар сақталған арнаулы мекеме. 1923 жылдан ұйымдастырылған. Алғашқы кезде губернаторлық, 1928 жылдан округтік архив, 1931 жылдан Қазақ АКСР-і Орталық архивінің Орал бөлімшесі, 1932 жылдан Орал (Батыс Қазақстан) облыстық мемлекеттік архиві деп аталды. Құжаттарының мерзімі 1917 жылдан басталады. Тарихи деректер кешені Жайық өңірінің тарихы, азамат соғысы, 1921 - 22, 1932 - 33 жылдардағы ашаршылық, экономикалық, әлеуметтік, мәдени өзгерістер, Ұлы Отан соғысы кезіндегі облыс тынысы, тың және тыңайған жерлерді игеру, халық шаруашылығының дамуы, тағы басқа құнды мағлұматтар береді. Архив қорында 520 мыңнан астам іс сақталған. Ғылыми-анықтамалық жүйесі тізбелерден, арнаулы шолулардан, каталогтардан, қорлардың қысқаша анықтамаларынан тұрады. Батыс Қазақстан облыстық архиві облыстағы 2 бөлімшесі мен 11 аудандық архивтерге ғылыми-әдістемелік басшылық жасайды.