Биогендік шөгінділер

Биогендік шөгінділер – тірі организмдердің әсерінен пайда болатын, құрамында органик. заттар көп тау жыныстары. Олар органикалық қалдықтардан немесе организмдер әсерінен түзілген минералдардан тұрады. Көбінесе мұхиттарда пайда болады. Биогендік шөгінділер зоогендік (жануарлар қалдығынан), фитогендік (өсімдік қалдығынан) болып екіге бөлінеді. Заттық құрамына қарай Биогендік шөгінділер кальцийлі, кремнийлі шөгінділер, глобигеринді, маржанды, птеропадалы, кокколитті, радиолярилі тұнбалар, маржанды құмдар деп топтастырылады. Фитогендік шөгінділерге жататын қара шірінді, сапропелдік жыныстар негізінен өсімдік қалдықтарынан түзілген. Жоғарғы топтағы өсімдіктер қалдығынан тұратын қара шірінді жыныстардан шымтезек, қоңыр көмір, тас көмір және антрацит, ал сапропелдік шөгінділерден богхед және жанғыш тақтатас пайда болады.