Ермахан Әбдіраман

Ермахан Шайхыұлы Әбдіраман (29.1. 1966. Түркістан облысы Түркістан қаласы) — журналист, сықақшы.. ҚазҰУ-ді бітірген (1993). 1986-88 жылдары Түркістан қаласындағы "Қайта қалпына келтіру" шеберханасында жұмысшы, 1991-92 жылдары "Қазақ университеті" (қазіргі "Санат") баспасында редактор, 1993 жылы "Түркістан" газетінің мәдениет бөлімінің меңгерушісі, Түркістан қалалық әкімшілігінің ішкі саясат бөлімінің бас маманы, 1995 жылы "Түркістан тынысы" телеарнасының директоры, 1995-96 жылдары "Тұран" телеарнасында редактор-режиссер.

1996-99 жылдары Түркістан қалалық мәдениет бөлімінде режиссер-сценарист болды. 1999-2006 жылы Әл-Фараби атындағы Қазақ ұлттық университетінің журналистика факультетінде дәріс берді. 2000-2001 жылдары "Бикеш" республикалық қыз-келіншектерге арналған газеттің бас редакторы, 2004 жылы "Айқын" газетінің тілшісі, 2006 жылы "Дала мен қала" газеті бас редакторының орынбасары, сол жылы "50-де 50" газетінің бас редакторы, «Айқын» газетінің тілшісі, меншікті тілшілер қосынының меңгерушісі, бас шолушы, жауапты хатшы, бас редактордың орынбасары, шығарушы редактор болып істеді. 2007–2009 жылдары «Қазақстан» ұлттық телеарнасында қайта ашылған «Қымызхана» әзіл-оспақ отауының сценарилерін жазды. Қазір «Аннұр сапа» баспасының директор – бас редакторы. Әрі әл-Фараби атындағы ҚазҰУ-дың журналистика факультетінде және Темірбек Жүргенов атындағы Қазақ ұлттық өнер академиясында дәріс береді.

«Ауыз тие отырыңыз», «Біртүрлі кітап», «Мынауың жынды екен», «Жатыпатар», «Шылдыр шүмек», «Аққудың сыңары», «Қазіргі қазақ сатирасы», «Ағынан жарылсақ...», «Әріп әлемі», «Сандалған сауал», «Қоңыр қажының күнделігі», «Атақты айтқыштар», «Медина мәзірі», «Сатира сарқыты» атты кітаптардың авторы. 2023 жылы «Әйелім базарда» атты сатиралық жинағы түрік тілінде шықты.

Ермахан Шайхыұлының шығармалары 4 оқулыққа және бірнеше антология мен жинақтарға енгізіліп, ағылшын, орыс, қытай, түрік, ұйғыр тілдеріне аударылды. Оның құрастыруымен әрі жауапты редакторлығымен «Күйеу келтір, қыз ұзат, тойыңды қыл» атты той кітабы және Ыбырай  Алтынсариннің  2 томдық, Камал Смайыловтың 3 томдық шығармалар жинағы, сондай-ақ Кемел Тоқаев, Тауман Амандосов, Әбілфайыз Ыдырысов, Шерхан Мұртаза, Қоңыр Мұқатаева, Аязби Бейсенқұлов, Темірғали Көпбай, Бауыржан Жақып, Нұржан Қуантайұлы, Болатбек Төлепберген, Шерияздан Елукеновтердің мерейтойларына арналған конференция материалдары мен Әл-Фараби атындағы Қазақ ұлттық университетінің 90 жылдық мерейтойына арналған көлемді жинақ жарық көрді. Сонымен бірге «Санат», «Атамұра», «Аннұр сапа», «Қазығұрт», «Аруна», «Алтай медиа» баспаларынан жарық  көрген  300-ге жуық кітаптың жауапты редакторы.

Балғабек Қыдырбекұлы атындағы сыйлықтың екі мәрте, Садықбек Адамбеков атындағы, сондай-ақ «Алтын қалам» сыйлықтарының лауреаты. Президент Алғысхатының, сонымен бірге «Бейбітшілік әлемі», «Әл-Фараби атындағы ҚазҰУ-дың 80 жылдығы», «Ел ардақтысы», «Қазақ журналистикасының қайраткері», «Қазақстан полициясына 25 жыл», «Қазақстан халқы Ассамблеясына 25 жыл», «Абай», «Шона Смаханұлы», «Қадыр Мырзалиев», «Төлеген Айбергенов» атындағы және Оңтүстік Қазақстан облысы әкімінің «Облысқа сіңірген еңбегі үшін», «Ерен еңбегі үшін» медальдарының иегері. Қазақстанның еңбек сіңірген қайраткері. Мәдениет және Ақпарат саласының үздігі. Қазақстанның құрметті профессоры.

Қазақстан Жазушылар және Халықаралық Жазушылар одағының, сондай-ақ Журналистер одағының мүшесі.