Жошыхан Мағауин

Жошыхан Мағауин (1924-43) - Абайдың шөбересі. Ақынның Мағауия деген баласының Жағыпарынан туған. Жошыхан ақын болған. Ұлы Отан соғысы жылдарында майдан даласынан қарындасы Ғазелге өлеңмен хат жазып тұрған.
«Бір теңіздің тамшысы едік екеуміз, Ұласамыз, бір мұратқа жетеміз...» - деп, өздерінің Абай ұрпағы екенін мақтаныш тұтатынын, сондықтан ақын атына кір келтіруге хақысы жоқ екенін, қашанда өзгелерге үлгі болуы керектігін қарындасының есіне салып отырған. Оның майданнан жазған хаттары Абай музейінің қорында сақтаулы. Бір топ өлеңі майданда қаза тапқан азаматтардың хаттарынан топтастырылған. «Жыр аманат» атты кітапқа енген. Семейдегі Абайдың әдеби-мемориалдық музейінің «Абай ұрпақтары – майдан шебінде» деп аталатын бөлімі Жошыхан өмірі жайындағы деректермен басталады.