Жұмабай Медетбаев

Жұмабай Медетбаев (08.03.1935, Қарақалпақстан, Қожелі ауданы Шоманай ауылы — 10.05.2005, Алматы) — актер, Қазақстанның (1998) және Қарақалпақстанның (1993) халық әртісі.

1960-62 жж. Ташкент қаласындағы театр және көркемсурет институтында оқыды; Алматы консерваториясын (қазіргі Қазақ ұлттық консерваториясы) бітірген (1965). 1965-66 жж. Қарағанды облыстық драма театрында қызмет етті. Оның алғашқы сомдаған рөлі — М.Әуезовтің "Еңлік - Кебек" трагедиясындағы Кебек рөлі (1965). 1966 жылдан Қазақ академиялық драма театры құрамында актер.

Негізгі ойнаған рөльдері: Шуақ, Әлібек, Маман, Асан (Әуезовтің "Қара қыпшақ Қобыланды", "Айман - Шолпаны" мен "Қарагөзінде"), Төлеген (Ғ.Мүсіреповтің "Қыз Жібегінде"), Долгов (Әуезов пен Л.С. Соболевтің "Абайында"), Баттал (Ә.Тәжібаевтың "Майрасында"), Ознобин (Ә.Нұрпейісовтің "Қан мен терінде"), Барақ (Т.Ахтановтың "Антында"), Табай (Қ.Мұхамеджановтың "Біз періште емеспізінде"), Ақжігіт (М.Көрімнің "Ай тұтылған түнінде), Орынбай, Ғани (С.Ахмадтың "Келіндер көтерілісі" мен "Күйеуінде"), Театр директоры (Ф.Эрвенің "Түлкі бикешінде"), Корифей (Еврипедтің "Медеясында"), Абыз (Софоклдың "Эдип патшасында"), т.б.

Домбырамен терме айтып, жыраулық өнермен де айналысқан; кезінде көп сериялы "Қымызхана" телеспектакліне қатысқан. Медетбаев радио, телевизия және кино өнері саласына да қатысып, еңбек сіңірген. Медетбаевтың орындауында "Қамбар батыр" жыры (1978) күйтабаққа жазылды. 1970 жылдан бастап киноға да түскен: Әубәкір ("Құрманғазы" телефильмінде), Орынбай ("Ебелекте", 1975), Қапан ("Ақырғы аманатта", 1980) т.б.

Қазақстан Жоғарғы Кеңесінің Құрмет грамотасымен марапатталған (1976).