Каролинг өнері
Каролинг өнері, каролинг қайта өркендеуі (фр. Renaissance carolingienne) — Ұлы Карл империясы мен Каролинг әулеті тұсындағы өнер (8-9 ғ.). Франция, Германия территориясы және т.б. елдерде "Каролинг қайта өркендеу дәуірі" деген атпен белгілі болды. Каролинг өнері византиялық әдіспен қатар "варварлық" тайпалардың жергілікті дәстүрін бойына сіңірген орта ғасырлық феодалдық-діни өнер негізінде қалыптасты. Тас шіркеулер (Ахендегі күмбезді сарай капелласы, жеті жүз тоқсан - сегіз жүз бес ж. ш. және базиликалар), монастырьлар, ақ сүйектер үйлері (Лорштегі құрылыс, сегізінші ғасыр) пошымының тартымды әрі қарапайым жасалып, бағана т.б. - ларды көптеп қолдануымен ерекшеленеді. Монументті және миниатюралық кескіндемеде, піл сүйегінен жасалған рельефтерді адамдар мен хайуандарды шыншылдықпен бейнелеу пайда болды. Діни тақырыптағы сюжеттермен (Жерминьи-де-Предегі мозаика, тоғызыншы ғасыр) қатар өміршең образдар ("Утрехт жалтырындағы" суреттер, тоғызыншы ғасыр) кездеседі. Мүсіндер және тағы басқа металдан жасалған бұйымдар белгілі.
