Кеден бажы

Кеден бажы– елдің кеден органдары өзінің кеден аумағына тауар әкелінген немесе осы аумақтан тауар әкетілген кезде өндіріп алатын міндетті жарна. Кеден бажының мөлшері кеден бажы салынатын тауарлардың тізімінен тұратын кеден тарифімен анықталады. Қазақстан Республикасында кеден бажының бірыңғай мөлшері белгіленген, ол кеден шекарасы арқылы өтетін адамдарға және мәміле түрлеріне байланысты өзгертуге жатпайды. Қазақстанда кеден бажы мөлшерлемесінің адвалорлық, айрықша және құрамдастырылған түрлері қолданылады. Елдің экономикалық мүдделерін қорғау мақсатында әкелінетін тауарларға кеден бажының ерекше түрлері: арнаулы, демпингіге қарсы және құрамдастырылған түрлері уақытша қолданылуы мүмкін. Сонымен бірге маусымдық баждар да қолданылады.