Конферансье

Конферансье (фр. conférencіer – баяндамашы) – концерттік- эстрадалық ойын-сауықтарды жүргізуші артист. Ол ойын-сауыққа қатысушыларды көрермендерге хабарлап әрі оларды ойын-сауық арасында уытты әзіл-оспақ, күлкілі қалжыңмен көңілдендіріп отырады. Конферансье өнері орындаушыдан мәнерлі үнді, қиыннан қиыстырар тапқырлықты, өткір тілділікті талап етеді. Көбінесе, фельетондар, әңгімелер оқу, өлең айту Конферансье қызметіне кіреді. Конферансье алғаш рет Париждің кабаресі мен кафе-шантандарында актерлер және әдебиет сүюшілер ұйымдастырған импровизацияланған әуесқойлық дивертисменттерде пайда болды. 19 – 20 ғасырларда Конферансье варьете театрлары мен миниатюраларда жиі өнер көрсетті, ал Ресейде 20 ғасырдың басында пайда болды.