Көктайғақ

Көктайғақ – қыста жылымықтан кейін суықтың қайта түсуінен жер бетінің мұз болып қатуы. Көбіне аязды ауа райынан кейін сіркіреме жауын жауғанда қалыптасады. Әдетте көктемде және күзде ауа райы салқындап, жер беті 0°С-қа дейін суынып, мөлдір және көгілдір жұп-жұқа (5 мм) мұзбен жабылады.

Салдары

Мұндай құбылыстың мал шаруашылығы мен адам баласына тигізер зияны зор. Көктайғақ түскенде жол қатынасы қиындайды, жайылымдағы мал тебіндей алмай қалады (мұз жылқының шашасын қиып тастайды). Малды қысқа жемшөп дайындамай, тек қана жайып баққан кезде көктайғақ жұтқа соқтырады. Онымен қоймай, көктайғақ транспортта апаттар, байланыс және энергия желілерінде үзілістер туғызады.

Кездесетін аймақтары

Бұл атмосферадағы қолайсыз құбылыс Қазақстан Республикасының оңтүстік және орталық аудандарында жиі байқалады. Солтүстік аудандарда көктайғақ сирек байқалатын құбылыс. Ал мемлекетіміздің батыс жазықтарында, орталығында және оңтүстік-шығысында көктайғақтың қалыңдығы 15 мм-ге жетеді. Қаратау жотасы, Қырғыз, Іле Алатауларының жел жақ беткейлерінде оның қалыңдығы 22 мм-ге дейін барады.