Маржа

Маржа (франц. marge беттің һашиясы, шеті) -

1. табыс алу үшін пайдаланылатын бір қаржы құралы құнының екі мәні арасындағы айырма. Мыс., сатып алушы бағасы мен сатушы бағасының арасындағы, пайыздық мөлшерлемелердін арасындағы, белгілі бір бағалы қағаздардың бағамдары арасынДа айырма. Маржа терминінің синонимі — "спрэд";
2. бағалы қағаздар ды маржиналдық шот деп аталатын ерекше шот аркылы инвестордың брокерлік несие беру шартымен сатып алу кезіндегі меншікті қаражатының ең төмен үлесі; инвестордың өзінің шотында болуға тиіс несиенің көмегімен сатып алатын бағалы қағаздар құнының ең төмен пайызы;
3. фьючерстік және опциондық келісімшарттармен сауда жасау кезінде биржалық мәміле бойынша міндеттемелердің орындалуын қамтамасыз ететін кепілдікті жарна; биржа тізімдемесінде көрсетілген биржалық тауарды сату мен сатып алу бағасының арасындағы айырмамен айқындалатын делдал табысы; несиенің белгіленген құнына нақты қарызгер төлеген үстеме. Кең мағынада алғанда, Маржа дегеніміз бағалы қағаздардың пайыздық мөлшерлемесі, бағамы, сатудың, сатып алудың, несиелендірудің бір мезгілдегі түрлі жағдайында тауарлар бағасы арасында орын алатын айырма.