Мереке Құлкенов

Мереке Құлкенов - 1951 жылы 8 қарашада Атырау облысы, Қызылқоға ауданы, Қарабау ауылында туған. ҚазМУ-ді 1978 жылы бітірген. «Қазақстан пионері» (қазіргі «Ұлан»), «Пионер», «Қазақ әдебиеті», «Жалын» сияқты газет-журналдарда, Қазақ теледидарында қызмет істеген. Республикалық «Ана тілі» газетінің, «Таң Шолпан» журналының бас редакторы болды. Қазір «Өлке» баспасының бас директоры.

Ұлы Махамбеттің өмірін айшықтаған, драматург Р.Отарбаевпен бірігіп жазған «Бас» драмасы 2003 жылы Қазақстан Республикасы Мәдениет министрлігінің екінші жүлдесін иеленді. Махамбеттің 200 жылдық мерейтойы қарсаңында «Махамбет кітапханасы» сериясымен 20 томдық кітапты және «Махамбет елі» кітап альбомын үш тілде (қазақша, ағылшынша, орысша) дайындауда жалпы редакциясын басқарды.

Қазақстан Республикасының еңбек сіңірген мәдениет қызметкері (1998), Президент сыйлығының лауреаты (2002). «Достық» орденімен марапатталған.

«Жібек жел», «Таңғы самал», «Үрей», «Халел Досмұхамедовтің өмірі мен қызметі», «Қазақстан», т.б. прозалық және публицистикалық шығармалардың, «Махаббат мұнарасы», «Жәңгір хан» пьесаларының авторы. Шығармалары бірнеше тілге аударылған. [1]

Дереккөздер өңдеу

  1. Қазақстан жазушылары: Анықтамалық/Құрастырушы: Қамшыгер Саят, Жұмашева Қайырниса - Алматы: «Аң арыс» баспасы, 2009 жыл