Мәдениет қайраткері төсбелгісі
«Мәдениет қайраткері» төсбелгісі — Қазақстан Республикасы мәдениет және ақпарат министрлігінің мекемелік марапаты.
«Мәдениет қайраткері» төсбелгісі | |
---|---|
![]() | |
Мемлекет | ![]() |
Түрі | Мекемелік марапат |
Жағдайы | берілмейді |
Негізделді | 12 сәуір 2007 жыл |
Соңғы иегері | 2011 жыл |
Тарихы
өңдеу«Мәдениет қайраткері» төсбелгісі Қазақстан Республикасы Мәдениет және ақпарат министрлігінің 2007 жылғы 12 сәуірдегі № 111 бұйрығымен мәдениет саласы қызметкерлерін мадақтау және моралдық ынталандыру мақсатында тағайындалды. Қазақстан Республикасы Үкіметінің 2011 жылғы Қаулысымен Мәдениет және ақпарат министрлігінің мекемелік марапаты — «Мәдениет саласының үздігі» төсбелгісі тағайындалды.
Ережесі
өңдеуТөсбелгі мәдениет саласының дамуына ерекше үлес қосқан мәдениет саласының қызметкерлеріне беріледі:
- көп жылғы еңбегі мен ел мәдениетінің дамуына қосқан жеке үлесі үшін;
- мәдениет саласын жақсартуға белсенді қатысқаны үшін;
- мәдениет саласындағы инновациялық қызметі үшін.
Төсбелгі мәдениет жүйесінде кемінде 15 жыл еңбек еткен мәдениет саласының қызметкерлеріне беріледі.
«Мәдениет қайраткері» төсбелгісімен марапатталған адамдарға белгіленген үлгідегі куәлік беріледі.
Төсбелгі кеуденің оң жағында мемлекеттік марапаттардың астына тағылады.
«Мәдениет қайраткері» төсбелгісімен марапаттау екі мәрте жүргізілмейді.
Белгінің сипаттамасы
өңдеуТөсбелгі шығыршықпен біріктірілген медал және металлды таған түрінде жасалады.
Медаль диаметрі 25 мм дөңгелек пішінді және көк эмальмен көмкерілген аясында сегіз алтын гүл күлтесі бар ашылмалы гүл түрінде болып келеді. Гүлдің ортасында көк эмальдан жасалған шеңберде Қазақстан Республикасының Мемлекеттік Туы рәміздерінің үзіндісі — сәулелері бар күн бейнеленген. Күн бейнеленген шеңбер қою көк түсті эмаль қайымасымен жиектеледі, оның бойында алтын әріптермен «Мәдениет қайраткері» деген жазу жазылған.
Өлшемі 24х15 мм болып келетін таған, пішіні төртбұрышты, көгілдір ақық түсті эпоксидті эмалмен қапталған (Қазақстан Республикасының Мемлекеттік Туының түсі), тағанның ішкі жағы ою-өрнекпен безендірілген.