Сайма корпорациясы

“Сайма” корпорациясы — прибор жасау кәсіпорны. Алматы қаласында 1992 ж. құрылған. Дүниежүзүзілік деңгейдегі станоктармен, құрылымдық аппараттармен жабдықталған. “Сайма” корпорациясы бір және көп тарифті электр санауыштарын, газ есептеуіштерін, тұрмыстық және өндірістік энергия көлемін электрондық тәсілмен өлшеу құралдары мен приборларын, бағдаршамдар, ыстық және салқын судың жұмсалу көлемін өлшеу құралдарын, т.б. шығарады. Оның штамп, прессформа, гальваникалық өндірістермен жабдықталған цехтары, жеке конструкторлық бюросы, зертханасы бар. Республиканың облыс орталықтарында, Қырғызстанда, Өзбекстанда, Тәжікстанда өндірістік цехтары мен бөлімшелері жұмыс істейді. Сайма шығаратын “Номад”, “Жусан”, “Тұлпар”, “Отан”, “Алатау”, “Жарық”, “Астана”, “Алтай”, “Батыс”, “Дала” атты приборлар әлемнің 10 еліне сатылады. Оның өнімдері Франциядағы Өндіріске жәрдемдесу қауымдастықтарының “SPІ алтын медалін” (2002), Женевада өткен 26-Халықаралық конвенцияда “Сапа алтын медалін” (2003) жеңіп алды.