Сейсмотектоника

Сейсмотектоника - Екі мағынасы бар: 1) бүгінгі тектоникалық процестердің сейсмикалық тұрғыдан көрініс беру процесінің жалпылама атауы; 2) аймақтардың сейсмикалық белсенділігі мен тектоникалық ерекшелігінің арасындағы байланыстарды зерттейтін геология саласы. Соңғы жағдайда сейсмикалық көрсеткіштер тектоникалық режимнің тұрақтылық дәрежесін, тектоникалық қозғалыстардың белсенді өрістеу аймақтарын анықтауға, сол қозғалыстардың бағырт-бағдарын нақтылауға пайдаланылады. Әдетте нақтылы бағытта созыла сағаланатын жерсілкіну ошақтарының тереңдіктерін анықтау терең жарылымдардың тереңдіктерін шамалауға мүмкіндік береді. Жерсілкіну ошақтарының динамикалық параметрлері таужыныстарды деформацияға ұшырататын күштердің мөлшері мен бағыт-бағдары жайлы мәліметтер бере алады. Сейсмотектоникалық зерттеу нәтижелері сейсмотектоникалық карта бетінде кескіңделеді, бұл карталарда таужыныстардың астасу пішіндері, яғни нақтылы тектоникалық құрылымдар жайлы мәліметтер, сол сияқты жерсілкінулердің эпицентрлік белдемдері көрсетіледі. Мұндай мәліметгер жерсілкінулердің сол сілкінулер көрініс берген аймақтың тектоникалық құрылыс ерекшеліктерімен өзара байланысын анықтап қана қоймай, болашақ жерсілкінулердің туындау орнын, күшін және жиілігін шамалауға көмектеседі, сөйтіп сейсмикалық аудандастыру карталарын жасақтауға жағдай туғызады.