Шаңырақ энциклопедиясы

"Шаңырақ" - үй-тұрмыс энциклопедиясы, 1990 ж. "Қазақ совет энциклопедиясының" бас редакциясы қазақ тілінде шығарған анықтамалық. Бас редакторы Р.Нұрғалиев. Кітап отбасындағы үй тұрмысын, адамдардың демалысы мен күнделікті шаруашылық тіршілігін ұйымдастыру, тұтыну заттарын пайдалану, т.б. жөнінде ғылыми да пайдалы кеңестер береді.

Негізінен "Босағаң берік болса" , "Ас - адамның арқауы", "Дені саудың - жаны сау", "Адам көркі..", "Уақытың - байлығың", "Жасыл желек жайқалып", "Жаңа дәстүр - жаңа салт", "Заң төрелігіне жүгінсек" деген тараулардан тұрады.

Энциклопедияға жемістен, көкөністен, балықтан, еттен, т.б. ас пісірудің дайын үлгісі ұсынылған. Сонымен қатар көрсетілетін алғашқы көмек, емдік өсімдіктер, үй жиһаздарын әзірлеу, күтіп ұстау, сәндеу, киім-кешек тігу туралы көптеген мағлұматтар алуға болады. Қазақ халқының ұмыт бола бастаған кішігірім салт-дәстүрлері туралы материалдар және құқық пен заң жөніндегі кеңестер берілген. кітап түрлі түсті суреттермен көркем безендірілген.