Ян Налепка

Налепка (Nalepka) Ян (бүркеншік аты – Репкин) (20. 9. 1912, Смижани, Шығ. Славакия,– 16. 11. 1943, Житомир облысы, Овруч қаласының маңы) – словак партизан отрядын ұйымдастырушы әрі оның командирі. Совет Одағының Батыры (2. 5. 1945) және Словак ұлттық көтерілісінің Батыры (5. 5. 1945). Шаруа отбасында туған. Село мұғалімі. 1941 ж. Словакияның клерикалдық-фаш. Қуыршақ үкіметі Налепканы әскери бөлімше құрамында совет-герман майданына жіберді. Н. 101-словак полкінде антифашистік топ құрып, 1943 мамыр айында совет партизандары жағына шықты. Бұрынғы словак солдаттарынан партизан отрядын құрды. Налепка Овруч қаласын азат ету ұрысында қаза тапты. 1-дәрежелі Ақ арыстан орденімен марапатталған.