Қазақстан Республикасы Сыбайлас жемқорлыққа қарсы іс-қимыл агенттігі

Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) — Қазақстан Республикасының Президентіне тікелей бағынатын және есеп беретін, Қазақстан Республикасының сыбайлас жемқорлыққа қарсы саясатын қалыптастыру мен іске асыруды және сыбайлас жемқорлыққа қарсы іс-қимыл саласындағы үйлестіруді, сондай-ақ сыбайлас жемқорлық құқық бұзушылықтарды анықтауды, жолын кесуді, ашуды және тергеуді жүзеге асыратын сыбайлас жемқорлыққа қарсы іс-қимыл жөніндегі мемлекеттік орган.

Қазақстан Республикасы Сыбайлас жемқорлыққа қарсы іс-қимыл агенттігі
(Сыбайлас жемқорлыққа қарсы қызмет)
Жалпы мағлұмат
Құрылған уақыты 13 маусым 2019 жыл
Оның алдындағы мекемелер ҚР Мемлекеттік қызмет істері министрлігінің Сыбайлас жемқорлыққа қарсы іс-қимыл ұлттық бюросы (2015-2016)
ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Сыбайлас жемқорлыққа қарсы іс-қимыл ұлттық бюросы (2016-2019)
Мекемені басқарады Қазақстан Республикасының Президенті
Штаб-пәтері Астана қаласы, Нұра ауданы, Қабанбай батыр даңғылы, 19, Б блогы
Төрағасы Жұмағали Асхат Жұмағалиұлы
Ресми сайты
www.gov.kz

Тарихы өңдеу

2001 жылғы 22 қаңтарда Қазақстан Республикасы Президентінің № 536 Жарлығымен таратылған Мемлекеттік кіріс министрлігінің Салық полициясы комитеті мен Салық полициясы академиясының функциялары мен өкілеттіктері беріліп, Үкімет құрамына кірмейтін орталық атқарушы орган ретінде Қаржы полициясы агенттігі құрылды.

2003 жылғы 23 желтоқсанда Қазақстан Республикасы Президентінің № 1255 жарлығымен Қаржы полициясы агенттігі Экономикалық және сыбайлас жемқорлық қылмысқа қарсы күрес жөніндегі агенттігі (қаржы полициясы) етіп қайта ұйымдастырылды.

2005 жылғы 25 ақпанда Қазақстан Республикасы Президентінің № 1521 Жарлығымен Экономикалық қылмысқа және сыбайлас жемқорлыққа қарсы күрес агенттігі (қаржы полициясы) Президентке тікелей бағынысты және есеп беретін мемлекеттік орган болып өзгертілді.

2014 жылғы 6 тамызда Қазақстан Республикасы Президентінің «Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы» № 883 Жарлығына сәйкес таратылған Қазақстан Республикасының Мемлекеттік қызмет істері агенттігі мен Экономикалық қылмысқа және сыбайлас жемқорлыққа қарсы күрес агенттігі бірігіп, Мемлекеттік қызмет істері және сыбайлас жемқорлыққа қарсы іс-қимыл агенттігі құрылды.

2015 жылғы 11 желтоқсанда Қазақстан Республикасының Мемлекеттік қызмет істері министрлігі мемлекеттік қызмет және сыбайлас жемқорлыққа қарсы іс-қимыл саласындағы уәкілетті орган ретінде құрылды, оған таратылып отырған Қазақстан Республикасының Мемлекеттік қызмет және сыбайлас жемқорлыққа қарсы іс-қимыл агенттігінің мүлкін және істерін басқару функциялары мен өкілеттіктері берілді. Министрлік құрамында Сыбайлас жемқорлыққа қарсы іс-қимыл ұлттық бюросы құрылды.[1]

2016 жылғы 13 қыркүйекте Қазақстан Республикасының Мемлекеттік қызмет істері министрлігі Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі болып қайта құрылды. Сыбайлас жемқорлыққа қарсы іс-қимыл ұлттық бюросы агенттіктің құрылымындағы ведомство мәртебесіне ие болды.[2]

Мемлекеттік қызмет жүйесін және сыбайлас жемқорлыққа қарсы іс-қимылды одан әрі жетілдіру мақсатында, Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Сыбайлас жемқорлыққа қарсы іс-қимыл ұлттық бюросы (Сыбайлас жемқорлыққа қарсы қызмет) Мемлекет басшысының 2019 жылғы 13 маусымдағы № 12 Жарлығымен [3] Қазақстан Республикасының Президентіне тікелей бағынатын Қазақстан Республикасының Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) болып қайта құрылды.

Агенттік Қазақстан Республикасының сыбайлас жемқорлыққа қарсы саясатын қалыптастыру мен іске асыруды және сыбайлас жемқорлыққа қарсы іс-қимыл саласындағы үйлестіруді, сондай-ақ сыбайлас жемқорлық құқық бұзушылықтарын анықтау, жолын кесу, ашу және тергеуді жүзеге асыратын құқық қорғау органы болып табылады.

Басшылар өңдеу

Аты-жөні Басқарған уақыты
Қаржы полициясы агенттігінің төрағасы
1 Болатбек Ақылбайұлы Бұлғақбаев 17 қараша 2001 — 20 наурыз 2004
Экономикалық қылмысқа және сыбайлас жемқорлыққа қарсы күрес агенттігінің төрағалары
2 Сарыбай Сұлтанұлы Қалмырзаев 20 наурыз 2004 — 12 желтоқсан 2008
3 Қайрат Пернешұлы Қожамжаров 12 желтоқсан 2008 — 20 қаңтар 2012
4 Рашид Төлеутайұлы Түсіпбеков 20 қаңтар 2012 — 6 тамыз 2014
Мемлекеттік қызмет істері министрлігі Сыбайлас жемқорлыққа қарсы іс-қимыл ұлттық бюросының басшысы
5 Қайрат Пернешұлы Қожамжаров 11 желтоқсан 2015 — 28 қыркүйек 2016
Мемлекеттік қызмет істері және сыбайлас жемқорлыққа қарсы іс-қимыл агенттігі Сыбайлас жемқорлыққа қарсы іс-қимыл ұлттық бюросының басшылары
6 Талғат Маратұлы Татубаев 28 қыркүйек 2016 — 1 маусым 2018
7 Қайрат Иматұлы Сұнтаев 1 маусым 2018 — 14 маусым 2019
Сыбайлас жемқорлыққа қарсы іс-қимыл агенттігінің төрағалары
8 Алик Жатқамбайұлы Шпекбаев 14 маусым 2019 — 16 сәуір 2021
9 Марат Мұратұлы Ахметжанов 16 сәуір 2021 — 25 ақпан 2022
10 Олжас Абайұлы Бектенов 25 ақпан 2022 — 3 сәуір 2023
11 Асхат Жұмағалиұлы Жұмағали 5 сәуір 2023 — бүгінгі күнге дейін

Қарамағындағы мекемелер өңдеу

  • Агенттіктің облыстар мен Алматы, Астана, Шымкент қалалары бойынша департаменттері

Ведомстволық марапаттар өңдеу

Қазақстан Республикасы Президентінің 2011 жылғы 30 қыркүйектегі «Мемлекеттік рәміздер және Қазақстан Республикасының Президентіне тікелей бағынатын және есеп беретін кейбір мемлекеттік органдардың, Қазақстан Республикасы Конституциялық Кеңесінің, құқық қорғау органдарының, соттардың, Қарулы Күштердің, басқа да әскерлер мен әскери құралымдардың ведомстволық және оларға теңестірілген өзге де наградаларының геральдикасы мәселелері туралы» № 155 Жарлығына [4] сәйкес Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) ведомстволық наградалары болып келесілер қарастырылады:

  • Медальдар:
    • [1](қолжетпейтін сілтеме) I, II, III дәрежелі «Мінсіз қызметі үшін»;
    • [2](қолжетпейтін сілтеме) «Құқық тәртібін қамтамасыз етуге қосқан үлесі үшін».
  • Төсбелгілер:
    • I, II дәрежелі «Үздік қызметкер»;
    • I, II дәрежелі «Үздік қызметші».

Дереккөздер өңдеу