ҚОҚАШБАЕВ БАЗАР
(1912-1985)
Қоқашбаев Базар 1912 жылы Шығыс Қазақстан облысы, Самар ауданы, Көк-Жыра ауылында дүниеге келген. Балалық шағы осы ауылда өткен. Аздап сауат ашқан. 1942 жылы Самар аудандық әскери комиссариатынан Ұлы Отан соғысына аттанады. 95- гвардиялық дивизиясының артиллериялық полк құрамына түседі.
1942 жылдан бастап, 1944 жылға дейін осы полкта Жоғарғы Мамон жерінен бастап, Полесье маңына дейін шайқастарға қатысқан.
1944 жылдан бастап 2- Беллорусиялық майдан шебінде болған. Полеск, Белорусс, Ломжа-Ружаньск шабуылына, Шығыс–Пруссия, Шығыс-Помер елді мекендерді азат ету әскери операцияларына қатысқан.
1942 жылы ауыр жарақат, ал 1944 жылы Брянск түбінде, 44 артиллериялық дивизиясының, 95-гвардиялық артиллериялық полкында, 3 дивизия құрамында болған кезде жеңіл жарақат алады.
1945 жылы 16 сәуір мен 8 мамыр аралығында Ұлы Отан соғысы барысындағы аса ірі шабуыл Берлин қаласын басып алу операциясына қатысты. Бұл көптен күткен жеңіс еді.
1945 жылы 15 мамырда көрсеткен ерлігі үшін мадақтама қағазын алады. Сол жылдың 14 шілде айында «Қызыл Жұлдыз» орденімен марапатталды.
1945 жылы Ұлы жеңістен кейін туған жері Көк- жыра ауылына оралады. Елге аман есен оралғаннан кейін, Самар ауданында сиыр фермасының бастығы, 1951 жылы денсаулығына байланысты қызметтен кетіп, атқосшы, содан кейін ағаш шебері болып жұмыс істеген. Әсия есімді қызбен отау құрады. 3 қыз 2 ұл сүйген. 1986 жылы 74 жасында дүние салды.
Базар кең пейілді, қолы ашық, елге беделді, сыйлы, құрметті адам болған. Көк-Жыра ауылының орта мектебінде «Ер есімі- ел есінде» атты стендте суреті ілінген. Сонымен қатар Қоқашбаев Базардың сол ауылда қойылған «Ерлігіңді елің мәңгі дәріптер» атты ескерткіште аты алтын әріппен жазылып тұр.
